Մշակույթ

«Պատմամշակութային արգելոց-թանգարանների և պատմական միջավայրի

ավելին

ԳՈՒՐՈՍԻ ԳԵՂԱՆԿԱՐՆԵՐՆ ՈՒ ԼՈՒՍԱՆԿԱՐՆԵՐԸ ՑՈՒՑԱԴՐՎԵԼ ԵՆ «ԶՎԱՐԹՆՈՑ» ԱՐԳԵԼՈՑ-ԹԱՆԳԱՐԱՆՈՒՄ
«Գուրոսի կտավները հաղորդում են այն ռոմանտիկ հույզերը, որն ապրել է նկարիչը բնության տեսարանների առջև: Գուրոսի նկարները կարծես բնությունից պոկված ու շրջանակի մեջ առնված տեսարաններ են», -այսպես են արվեստաբանները բնորոշել Գուրոսի գեղանկարները։ Նկարիչների միությունում տարիներ առաջ բացված նրա ցուցահանդեսները աննկատ չմնացին, գուցե պատճառների մեկն էլ այն էր, որ նկարչի արվեստում մի առանձին ու կարևոր տեղ ունեն հայկական հուշակոթողները։ Գուրոսի (Գուրգեն Պարոնյան) վրձնած հուշակոթողները ցուցադրվում են «Զվարթնոց» պատմամշակութային արգելոց թանգարանում, որտեղ մի առանձին սրահում ներկայացված են նաև նրա լուսանկարները։ Դրանց թվում են Գորիս քաղաքի, հուշարձանների, գորիսեցիների առօրյան ներկայացնող լուսանկարներ։ Գուրոսի լուսանկարներում մեծ տեղ են գրավում կասկադային ճարտարապետություն ունեցող գյուղերը, որոնք 1960-ական թվականներից գրեթե ամբողջովին դատարկվել են։

26 դեկտեմբերի 2018, 13:05

«Պահպանության ծառայություն» ՊՈԱԿ-ի մշակութային միջոցառումների կազմակերպման և մարքեթինգի բաժնի նախաձեռնությամբ, «Ես կարող եմ զգալ ժամանակի շունչը» կրթական ծրագրի շրջանակում, Երևանի լսողության խանգարումներ ունեցող երեխաների հատուկ կրթահամալիրի սաներն այցելել են «Մեծամոր» պատմահնագիտական արգելոց-թանգարան։
Այստեղ նախ ծանոթացել են թանգարանի նշանակությանը, ապա արգելոց-թանգարանի վարիչ Արտավազդ Զաքյանը ներկայացրելով ցուցադրությունը, մանրամասնել է, թե երբ և որտեղից են գտնվել ցուցադրվող առարկաները։ Լսողության խանգարում ունեցող պատանիները հնարավորություն են ունեցել հետաքրքիր տեղեկություն ստանալ Մեծամորի հնավայրի պեղումների արդյունքում հայտնաբերված և արդեն թանգարանում ցուցադրվող հնագիտական նյութի մասին։«Ես կարող եմ զգալ ժամանակի շունչը» ամենամյա կրթական ծրագիրը (հեղինակ՝ ՊՈԱԿ-ի փորձագետ, մանկավարժական գիտությունների թեկնածու Դավիթ Պողոսյան ) իրականացվում է 2010 թ․-ից։ Նպատակը` ՊՈԱԿ-ի մասնաճյուղ արգելոց-թանգարանները մտավոր և ֆիզիկական սահմանափակ հնարավորություններով անձանց մատչելի դարձնելն է:

21 դեկտեմբերի 2018, 17:06

Դեկտեմբերի 25-ին, ժամը 14: 00-ին «Զվարթնոց» պատմամշակութային արգելոց-թանգարանում կբացվի ինքնուս լուսանկարիչ, ՀԽՍՀ վաստակավոր նկարիչ Գուրոսի (Գուրգեն Պարոնյան) գեղանկար և լուսանկար աշխատանքների ցուցահանդեսը։
Գուրոսը ծնվել է Գորիսում` Մելիք Օհանյանների հայտնի գերդաստանում։ Քսաներկու տարեկանից զբաղվել է լուսանկարչությամբ` փաստագրել հայրենի բնաշխարհի գողտրիկ անկյունները, ամենահետաքրքիր ու նվիրական պատկերները, գորիսեցիների, քաղաքի կենցաղը, կասկադային ճարտարապետություն ունեցող գյուղերը:
Գուրոսի հույզերն ու ապրումները յուրովի են արտահայտվում նաև կերպարվեստում։ Նրա ստեղծագործություններում զգացվում է անսահման սեր ու նվիրվածություն ծննդավայրին, բնությանը:
Լուսանկարչի` պատմական հուշարձաններին նվիրված գեղանկար աշխատանքներից քսանհինգը, նաև՝ բնօրինակ ապակե սևանկարների մի զգալի մասը (1988 թ.) պահվում է «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ում։

21 դեկտեմբերի 2018, 14:45

«Մեծամոր» պատմահնագիտական թանգարանում նշել են Հայկական ՍՍՀ վաստակավոր երկրաբան, «Մեծամոր» արգելոց-թանգարանի հիմնադիր Կորյուն Մկրտչյանի ծննդյան 90-ամյակը: Արգելոց-թանգարանում էին հավաքվել մեծանուն հայի հարազատները, ընկերները, գիտության` երկրաբանության, հնագիտության ոլորտում նրա ներդրած ավանդը բարձր գնահատողները: Կորյուն Մկրտչյանը բացառիկ դեր է ունեցել Հայաստանի երկրաբանական կառուցվածքի և օգտակար հանածոների հետազոտման, հետախուզման և հայտնաբերման գործում: Գիտնականի ավանդն անգնահատելի է նաև հնագիտության ոլորտում:Կորյուն Մկրտչյանը մեծ ավանդ ունի Մեծամոր հնավայրի հայտնաբերման և երկարատև ուսումնասիրության գործում։ 1964-1967 թթ․ նա հայտնաբերել է Մեծամորի մետաղաձուլական հնագույն կենտրոնը, եղել` հնագիտական պեղումների համաղեկավարը: 1970-1976 թթ․ հիմնել է «Մեծամոր»-ի թանգարանը, հետագայում կազմակերպել `առաջին ցուցադրությունը:

21 դեկտեմբերի 2018, 14:13

«Պահպանության ծառայություն» ՊՈԱԿ-ի Սյունիքի մարզային ծառայության նախաձեռնությամբ Գորիսի Յուրի Բախշյանի անվան դպրոցում անցկացվել է բաց դաս՝ «Բղենո Նորավանքը» թեմայով։ Ներկա են եղել կրթօջախի մանկավարժները, աշակերտներ։

Բաց դասի ընթացքում ցուցադրվել է Բղենո Նորավանքի ճարտարապետական առանձնահատկությունների մասին պատմող ֆիլմ, որտեղ մանրակրկիտ ցուցադրվել են կառույցի պատկերաքանդակներն ու զարդաքանդակները: Լուսանկարների միջոցով աշակերտները ծանոթացել են Բղենո Նորավանքի մոր և մանկան պատկերով այն հարթաքանդակին` որը ցուցադրվում է Նյու- Յորքի «Մետրոպոլիտեն» թանգարանում։ Զրուցել են նաև Բղենո Նորավանքում գրված «Էջմիածնի ավետարան»-ի մասին: Անդրադարձել են վանական համալիրի մասին հիշատակած պատմիչների աշխատություններին:

18 դեկտեմբերի 2018, 09:46

Եվրոպական ժառանգության օրերի շրջանակում «Պահպանության ծառայություն» ՊՈԱԿ-ը, «Տերյան» մշակութային կենտրոնի հետ համատեղ «Զվարթնոց» պատմամշակութային արգելոց-թանգարանի տարածքում իրականացրել են «Հայկական ավանդական հարսանիք» ներկայացում-միջոցառումը: Նպատակը` ավանդական հայկական հարսանիքի մոռացված ավանդույթների մասին հիշեցնելն է:
Գեղեցիկ կատարումներով, զուռնա-դհոլով հարսանեկան ծեսը սկսվել է հարսի տնից` դստերն ամուսանական կյանքին պատրաստող մոր օրհնանքով ու խրատներով: Քչերն են հիշում, որ մինչ հարսնառների` զուռնալ դհոլով ու խոնչա-բողչայով հարսի տուն գնալը «աղվեսն» էր տեղ հասնում` լուրը հայտնելու: Միջոցառման մասնակիցները վերհիշեցին այդ ավանդույթը, ականատես եղան նաև մի շարք այլ տարրերի ներկայացմանը: «Կարին» ազգագրական երգի-պարի համույթի, «Ոստան» ավանդական երգ ու պարի անսամբլի, Ռ. Հարոյանի անվան «Մասունք» ազգագրական երգի-պարի համույթի գրավիչ կատարումների շնորհիվ վերհիշել են` փեսային կոսբանտ, հարսին` գոտի կապելը և այլն:

18 դեկտեմբերի 2018, 09:42

Մշակույթի ոլորտում նախատեսվում է մեդիա նախագծեր իրականացնել մի շարք թանգարաններում: «Պահպանության ծառայություն» ՊՈԱԿ-ի մասնաճյուղերից ընտրվել է «Գառնի» պատմամշակութային արգելոց-թանգարանը, որտեղ նախատեսվում է մուլտիմեդիա նախագիծ իրականացնել: Մասնավորապես ՊՈԱԿ-ի տնօրինության առաջարկով մուլտիմեդիա նախագծում կընդգրկվեն այցելուներին քիչ հայտնի ենթահուշարձանները: Յուրօրինակ մոտեցմամբ` աուդիո և վիդեո տարբերակներով դրանք կներկայացվեն զբոսաշրջիկներին, կարող է կազմակերպվել նաև ժամանակավոր շրջիկ ցուցադրություն:

11 դեկտեմբերի 2018, 09:58

Ֆրանսիացի երգիչ Ժերեմի Դելվերը հյուրընկալվել է «Գառնի» պատմամշակութային արգելոց-թանգարանում: Ժ. Դելվերը հայ հանդիսատեսին հայտնի է դարձել Շառլ Ազնավուրի հոնգեհանգստի արարողության ժամանակ «Հայկական վալս» ստեղծագործությունը կատարելուց հետո: «Պահպանության ծառայություն» ՊՈԱԿ-ի տնօրեն Արա Թարվերդյանի ուղեկցությամբ նա շրջել է արգելոցի տարածքում` ծանոթացել հայկական ճարտարապետության գոհարներից մեկի պատմությանը, ունկնդրել` տաճարի ներսում հնչող հայկական դուդուկի հնչյունները: Հայկական երաժշտությունը Ժ. Դելվերին հիշեցրել է Շառլ Ազնավուրին տված վերջին հրաժեշտը:

10 դեկտեմբերի 2018, 15:17

«Պահպանության ծառայություն» ՊՈԱԿ-ի և Երևանի պատմության թանգարանի հետ համատեղ հին ու նոր Երևանի վավերագրերի յուրօրինակ ցուցադրություն է բացվել «Մետրոնոմ» կենտրոնում։ Երևանի 2800 ամյակին նվիրված «Հին ու նոր Երևան» խորագրով ցուցահանդեսին ներկայացվել են ՊՈԱԿ-ի ֆոնդերում պահվող Արտաշես Վրույրի` ապակե սևանկարներից արված լուսանկարները /1927 թ./ և Երևանի պատմության թանգարանի տրամադրած մայրաքաղաքի հին լուսանկարներ, որոնցից ամենահինը` Երևանի բերդի և Ձորագյուղի ընդհանուր տեսարանը պատկերող լուսանկարն է /1885թ./։Ցուցահանդեսի 60-ից ավելի լուսանկարները պատմում են հին ու նոր Երևանի ճարտարապետական դիմագծի, նշանավոր անձանց մասին։

10 դեկտեմբերի 2018, 15:07

«Մշակութային ժառանգության եվրոպական տարի․ կիսվելու արվեստը» խորագրով միջոցառումներ են անցկացվել «Գլաձորի համալսարան» պատմամշակութային արգելոց-թանգարանում։ Արգելոց-թանգարանը հյուրընկալել է Վերնաշենի միջնակարգ դպրոցի աշակերտներին, մանկավարժներին ու ծնողներին։ Երբեմնի կրթական, հոգևոր, մշակութային, հասարակական, քաղաքական, փիլիսոփայության նշանավոր կենտրոն «Գլաձորի համալսարան»-ում մանկավարժները խոսել են մասնագիտական հմտությունների մասին, հանդիպումը կարծես վերածվել է փորձի փոխանակման յուրօրինակ հարթակի։ Հետաքրքիր տեսակետներով հանդես են եկել նաև արգելոց-թանգարանի Բարիս Քոչարյանը, ՊՄՊ Վայոց ձորի մարզային ծառայության պետ Մելանյա Դովլաթյանը։

10 դեկտեմբերի 2018, 14:22