Առողջ Ապրելակերպ
Դպրոցականի անկյուն
Ընթրիք, որը չի խանգարի հագիստ քնելը գիշերը

Բոլորին անհրաժեշտ է հանգիստ և խորը քուն, որպեսզի առավոտյան զարթնելուց հետո թարմ, առույգ, ընկալունակ լինեք, ունենաք բարձր տրամադրություն և նախաճաշելու ախորժակ: 

Քնի ընթացքում արտադրվում է սերոտոնին, մի հորմոն, որը ֆոլաթթվի և B6, B12 վիտամինների հետ միասին օգնում է ապահովել առողջ քուն: Կան մթերքներ, որոնք հանգստացնում են մարմինն ու ավելացնում սերոտոնինի մակարդակը՝ ապահովելով հանգիստ քուն:


Ածխաջրերի ազդեցությունը


Պարզ ածխաջրերը, որոնք առկա են քաղցրավենիքի, խմորեղենի, մակարոնեղենի և հացի մեջ նվազեցնում են սերոտոնինի մակարդակը և խանգարում են հանգիստ քնել:

Բարդ ածխաջրերը հակառակը՝ բարենպաստ են քնի համար, բարձրացնում են սերոտոնինի մակարդակը:

Բարդ ածխաջրերով են հարուստ ամբողջական հացահատիկներից պատրաստված հացը, մակարոնեղենը, ձավարեղենը, շագանակագույն բրինձը:


Դյուրամարս սպիտակուցներ


Երեկոյան կարելի է հեշտությամբ մարսել անյուղ սպիտակուցներ՝ թռչնամիս, ձկնեղեն, անյուղ պանիրներ: Սրանք պարունակում են ամինաթթուներ, որոնք բարձրացնում են սերոտոնինի մակարդակը: Այ թռչնամսի թևիկներից կամ, տապակած ձկնից կարելի է հրաժարվել, քանի որ սրանք դժվար են մարսվում և երկար ժամանակ կարող են արթուն պահել թե՛մեծին, թե՛ երեխային:


Օգտակար ճարպեր

Ոչ հագեցած ճարպերը ևս բարձրացնում են սերոտոնինի մակարդակը, օր.՝ երեկոյան արտակարգ սնունդ են ընդեղենը, ձիթապտղի, կտավատի կամ այլ լավ բուսայուղով ցողված աղցանները, օմեգա – 3ով հարուստ ձկնեղենը:


Հեղուկներ


Երեկոյան բացառեք գազավորված ըմպելիքները, լավ կլինի ընդհանրապես հրաժարվել դրանցից:

Լավ տարբերակ են խոտաբույսերով հանգստացնող թեյերը:

Բոլոր հեղուկները կարելի է ընդունել մինչև երեկոյան 7-8-ը, որպեսզի գիշերն արթնանալու կարիք չլինի: Որպես երեկոյան ուտեստ բավականին հանգստացնող և քունը խթանող ազդեցություն ունեն մածունն ու կաթը, սրանք կլինեն արտակարգ ուշ երեկոյան սնունդ:

Թարմ կանաչիները նույնպես ունեն հանգստացնող ազդեցություն և խրախուսվում են երեկոյան:


Բարի գիշեր և անուշ երազներ