Ի՞նչ է թաքնված մաշկի շերտերում

Որպեսզի այս ջանքերը զուր չանցնեն, պետք է հասկանանք`   ինչպես են ազդում կոսմետիկ միջոցները, արդյո՞ք դրանք միշտ անվտանգ են, ինչպե՞ս ընտրել մաշկի խնամքի այն մեթոդը, որն ամենաարդյունավետը կլինի:

 

Նշենք, որ մաշկի հիմնական ֆունկցիան օրգանիզմի ներքին միջավայրի սահմանազատումն է արտաքին միջավայրից: Այս պատասխանատու գործն իրականացվում է նրա շերտերի շնորհիվ, որոնք, հաջորդելով մեկը մյուսին, անընդհատ թարմացվում են:

 

Եղջերացող շերտ

 

Մաշկի եղջերացող շերտը կազմված է սպիտակուցային թեփուկներից, որոնք իրար միանում են լիպիդների ճարպանյութով: Վերջինս խոչընդոտ է ջրի և օտարածին նյութերի համար, ինչպիսիք են կոսմետիկ միջոցները:

 

Որոշ կոսմետիկ միջոցներ, այնուամենայնիվ, քայքայում են մաշկի պաշտպանիչ շերտը, որի պատճառով այն ջրազրկվում է, դառնում զգայուն արտաքին ազդակների նկատմամբ:

 

Որքան էլ որ ամուր լինի եղջերացող շերտը, այն ևս մաշվում է, ապա վերակառուցվում՝ պոկված թեփուկներին փոխարինում են նորերը, որոնք ձևավորվում են էպիդերմիսի խորքում:

 

Էպիդերմիս

 

Այս շերտի գլխավոր ֆունկցիան եղջերացող շերտի վերարտադրումն է: Էպիդերմիսի հիմնական բջիջները՝ կերատինոցիտները, հասունանալով շարժվում են դեպի մաշկի մակերես: Էպիդերմիսի ամենաստորին՝ բազալ շերտում են գտնվում անընդմեջ կիսվող բջիջները:

 

Մաշկի գունավորման համար պատասխանատու բջիջները՝ մելանոցիտները, տեղակայված են կերատինոցիտների միջև՝ բազալ թաղանթի վրա: Էպիդերմիսում են գտնվում նաև օտարածին նյութերն ու միկրոօրգանիզմները ճանաչող իմուն բջիջները՝ Լանգերհանսի բջիջները, ինչպես նաև շոշափելիքի զգացողության համար պատասխանատու բջիջները՝ Մերկելի բջիջները:

 

Դերմա

 

Դերման փափուկ հող է էպիդերմիսի համար: Այստեղ են գտնվում մաշկը սնուցող արյունատար և լիմֆատիկ անոթները: Հենց դերմայի արյան շրջանառությամբ է պայմանավորված մաշկի վարդագույն երանգը, եթե դերմայի սնուցումը խանգարվում է, մաշկը դառնում է դեղնավուն նրա տակից թափանցող ճարպային հյուսվածքի հաշվին:

 

Դերմայում են գտնվում սպիտակուցային կառույցները՝ կոլագենային և էլաստինային թելերը, որոնք մաշկին հաղորդում են ամրություն և էլաստիկություն: Կոլագենային թելերը հաստ են, դասավորվում են խմբերով, իսկ էլաստինային թելերը բարակ են, դասավորվում են հատ-հատ՝ ճյուղավորված ցանց կազմելով:

 

Սպիտակուցային թելերի միջև տարածվում է գելանման նյութը՝ հիալուրոնաթթուն, որն օժտված է ջուրը պահող հատկությամբ: Թեև դերման ծածկված է էպիդերմիսով և եղջերացող շերտով, այն ժամանակի ընթացքում ևս վնասվում է: Նրա կառույցների ամբողջականությունից է կախված՝ ինչքանով հարթ կամ թորշոմած կլինի մաշկը:

 

Ճարպային հյուսվածք

 

Շատ աղջիկներ, հետևելով մոդելներին, փորձում են ազատվել «ավելորդ» ճարպերից, իսկ իրականում հենց ճարպային հյուսվածքն է գեղեցկացնում կնոջը: Ճարպն ունի նաև կարևոր ֆունկցիաներ, այն պահպանում է մարմնի ջերմաստիճանը, մեղմում է հարվածները և, ի վերջո, հումք է կանացի հորմոնների ստեղծման համար:

 

Եզրակացություն

 

Այսպիսով, մաշկի կազմության մեջ մտնում են կենդանի կառույցներ՝ էպիդերմիսի, դերմայի և ենթամաշկային ճարպային շերտի բջիջներ, միջբջջային նյութեր՝ կոլագեն, հիալուրոնաթթու, եղջերացող շերտի լիպիդներ, անկենդան կառույցներ՝ եղջերացող շերտի թեփուկներ:

 

Կենդանի բջիջների վրա կոսմետիկ միջոցների ազդեցությունը նկատելու համար ժամանակ է պահանջվում, իսկ եղջերացող շերտի վրա դրանց ազդեցությունը կարելի է տեսնել նույնիսկ րոպեների ընթացքում: Թե ինչպես է մաշկի վրա անդրադառնում այս կամ այն կոսմետիկ միջոցը, պետք է հետևել ինչպես նրա անմիջական, այնպես էլ երկարատև ազդեցությանը: