Երկար ապրելուն օգնում են անհատականության «դրական» գեները

Մինչ այժմ հետազոտություններն ուղղված էին երկարակյացների գեների տարատեսակության ուսումնասիրմանը, սակայն Ալբերտ Էյնշտեյնի անվան քոլեջի հետազոտողները կարծում են, որ երկարակյացի գենի մի մասն էլ կարող են լինել անհատականության բնավորության գծերը:

Դրական տրամադրված, ուրախ, հանգիստ, անկեղծ մարդիկ երկար են ապրում: Գիտնականները հետազոտություն են անցկացրել հրեա-աշկենազների մասնակցությամբ: Աշկենազներն ընտրվել են այն պատճառով, որ բոլորն էլ գենետիկորեն միանման են, հետևաբար ավելի դյուրին է որոշել գենետիկ տարբերությունները:

Ավելի վաղ կատարված հետազոտություններն արդեն ցույց էին տվել, որ մարդու անհատականությունը գենետիկ հիմք ունի և կարող է անմիջականորեն ազդել առողջության վրա: Տվյալ հետազոտության ժամանակ 243 երկարակյացի մոտ ուսումնասիրվել է նաև անհատականությունը բնութագրող գենետիկ հիմնավորումները:

Անհատականության գնահատման ժամանակ գիտնականները հայտնաբերել են այնպիսի հատկություններ, որոնք պարզ արտացոլում են երկարակյացների կյանքի նկատմամբ դրական վերաբերմունքը: Նրանց մեծ մասը հանգիստ, ուրախ և անկեղծ մարդիկ են, որոնք կարծում  են՝ կյանքում ամենագլխավորը ժպիտն է և սեփական հույզերն անկեղծ արտահայտելը:

Հեղինակ`   Ն.Ա.

Սկզբնաղբյուր`   Առողջապահության լրատու