Պտղատու ծառերի հասակային շրջանները

 

Վեգետատիվ մասերի ուժեղ աճ

 

Սկսվում է սերմի ծլելուց և շարունակվում մինչև առաջին պտղաբերությունը: Այդ շրջանում բույսը կազմակերպում է ցողունը, կմախքային ճյուղերն ու աճակալող մասերը: Ագրոտեխնիկայի խնդիրներն են՝ նպաստել սաղարթի ձևավորմանը և պայմաններ ստեղծել, որպեսզի արմատային համակարգը խորը թափանցի հողի շերտերը:

 

Աճ և պտղաբերություն 

 

Սկսվում է առաջին պտղաբերությունից և շարունակվում մինչև համակարգված պտղաբերությունը: Այդ շրջանում ծառը դարձյալ աչքի է ընկնում իր ամենամյա ուժեղ աճով: Ագրոտեխնիկայի խնդիրներն են՝ սաղարթի հետագա ձևավորումը, բերքի խնամքը և հողի համապատասխան մշակությունը:

 

Պտղաբերություն և աճ

 

Այդ շրջանն սկսվում է լրիվ պտղաբերությունից մինչև տվյալ սորտին յուրահատուկ ամենաբարձր բերքատվությունը: Այդ ընթացքում վեգետատիվ աճն աստիճանաբար մարում է, կմախքային ճյուղերի ծայրամասային շիվերի աճը թուլանում է, աճակալող ճյուղերը՝ աստիճանաբար մահանում: 

 

Պտղաբերություն 

 

Բերքի քանակը շատ է լինում, սակայն ապրանքային բարձր որակ չի ունենում: Ագրոտեխնիկայի խնդիրներն են՝ ճյուղերի էտը, նոսրացումը:

 

Պտղաբերություն և մահացում

 

Ծառը լրիվ դադարեցնում է կմախքային ճյուղերի աճը և աճակալող ճյուղերն սկսում են մահանալ, ստացվում է ավելի ցածր բերք:

 

Մահացում, պտղաբերություն և աճ 

 

Այդ շրջանում մահացումն ուժեղանում է, և խիստ ընկնում է ծառի պտղաբերությունը: Այս ժամանակ պետք է նպաստել սաղարթում նոր, ուժեղ ճյուղավորությունների առաջացմանը: 

 

Մահացում, աճ և պտղաբերություն 

 

Այդ շրջանում ավելի է ուժեղանում առաջին կարգի խոշոր կմախքային ճյուղերի չորացումը, և առաջանում են նոր, ուժեղ շիվեր, խիստ կերպով ընկնում է պտղաբերությունը և պտուղների որակը: Ագրոտեխնիկայի հիմնական խնդիրն է երիտասարդացնելու նպատակով կատարել ծառերի  ուժեղ էտ:

 

Մահացում և աճ 

 

Սկսում են չորանալ հիմնական կմախքային ճյուղերը, և առաջանում են մացառներ: 

 

Աճ 

 

Այդ շրջանում չորանում են ծառերի սաղարթի բոլոր մասերը, և ցողունի հիմքից սկսում են առաջանալ նոր շիվեր, որոնք սկիզբ են դնում կյանքի նոր ցիկլի: