Ի՞նչ անել տանը երկրաշարժից հետո

Եթե, այնուամենայնիվ, երկրաշարժից հետո որոշել եք ապրել Ձեր տանը, ապա՝

• Ցանկալի է այդպես վարվել մասնագետ շինարարի հաստատած եզրակացությունից հետո:
• Ստուգեք՝ չկա՞ արդյոք գազի արտահոսք: Սենյակում գազի հոտ զգալիս լուցկի կամ գազայրիչ մի՛ վառեք, մի՛ ծխեք, քանի որ դա պայթյուն կառաջացնի: Անջատեք գազամատակարարման սարքերն ու գազածորակները: Եթե Ձեզ լուսավորություն է անհրաժեշտ, օգտվեք գրպանի լապտերից:
• Ստուգեք՝ վնասված չե՞ն արդյոք էլեկտրահաղորդալարերը: Մի՛ դիպչեք էլեկտրահաղորդման գծերին, կտրված էլեկտրահաղորդալարերին և դրանց հետ առնչվող առարկաներին:
• Ստուգեք՝ վնասված չե՞ն արդյոք վառարաններն ու ծխնելույզները, կրակ մի՛ վառեք, եթե դրանք վնասված են:
• Ստուգեք՝ կոյուղին գործու՞մ է, թե՞ ոչ:
• Հետևեք՝ արդյո՞ք հետցնցումներից պատերի վրա չեն առաջացել նոր ճեղքեր:
• Ուշադիր զննեք բնակարանը՝ արդյոք չե՞ն թափվել վտանգավոր հեղուկները: Փորձեք մեկուսացնել թափված կամ ցրիվ եկած վտանգավոր նյութերը (քիմիկատներ, բենզին, նավթ):
• Զգուշորեն բացեք պահարանների և խորդանոցի դռները, որպեսզի ծանր առարկաներ չընկնեն Ձեզ վրա:
• Ապահովության համար հագեք հաստ ներբաններով կոշիկներ (կոտրված ապակիներից, սուր բեկորներից վնասվածքներ չստանալու համար), երկարաթև հագուստ, ձեռնոցներ:
• Եթե էլեկտրականությունն անջատվել է, ապա առաջնահերթ օգտագործեք սառնարանում եղած մթերքը, քանի դեռ չի փչացել, ապա անցեք պահածոյացված և չորացրած մթերքին:
• Խմելուց առաջ պարտադիր եռացրեք ջուրը համաճարակի հնարավոր վտանգից խուսափելու համար:

Աղբյուրը՝ «Արտակարգ ալիք» լրատվական կենտրոն