Էկրանի առջև երկար նստելը՝ մեջքի ցավի պատճառ

Երեխաների մեջքի ցավի հիմնական պատճառը վատ կեցվածքն է: 648 երեխայի և դեռահասի շրջանում կատարված հետազոտության տվյալներով նրանց կեսը մկանները ճիշտ չօգտագործելու հետևանքով ոչ հատուկ իրանամկանային ցավ է ունեցել:

Երեխաները մեծ ռիսկի են ենթակա հատկապես ձմռանը, երբ նրանք պակաս ակտիվ են և ավելի շատ ժամանակ են անցկացնում պլանշետի, հեռախոսի, հեռուստացույցի էկրանի առջև:

Անշարժ նստելը երեխաներին ստիպում է գլուխն առաջ խոնարհել և կռանալ: Սա շատ վատ է մեջքի մկանների համար և առաջացնում է հոդերի կծկվածություն:

Քլիվլենդի կլինիկան ծնողներին խորհուրդ է տալիս հետևել երեխաների կեցվածքին հետևյալ կերպ՝

1. Զարթուցիչով ժամանակ սահմանեք:

Սա չի նշանակում, որ երեխան պետք է դադարի խաղալ, պարզապես պետք է 20-30 րոպեն մեկ վեր կենա, քայլի:

2. Հետևեք, որպեսզի երեխան նստի բարձր մեջքով աթոռին կամ հատուկ բարձ դրեք:

3. Կարգավորեք էկրանի և աթոռի դիրքը:

Էկրանը պետք է լինի աչքերի մակարդակին հավասար կամ մի քիչ ցածր: Բացի այդ, աթոռն այնպես կարգավորեք, որ երեխայի երկու ոտքերը լավ դիպչեն հատակին:

4. Խոսեք կեցվածքի կարևորության մասին:

Հեշտ չէ երեխային ստիպել խաղի միջնամասում ընդմիջում անել: Նա ինքը պետք է գիտակցի ճիշտ կեցվածքի կարևորությունը:

Աղբյուրը` Med.news.am