15 օրյա ժամկետում Ֆրանսիայի նախագահը օրինագիծը կարող է հաստատել, կամ ուղարկել վերանայման:

Թուրքիան բազմաթիվ սպառնալիքներ էր հղել Ֆրանսիայի ղեկավար մարմիններին մինչև օրինագծի ընդունումը, իսկ նրանց գլխավոր թիրախը եղել է օրինագծի հեղինակ Վալերի Բուայեն, ում սպառնացել էին սպանել: Բուայեի ներկայացմամբ էր, որ հարցը Ֆրանսիայի Ազգային Ժողովում դրվեց քվեարկության և գրեթե բոլոր պատգամավորները կողմ էին և պաշտպանել էին օրինագիծը:

Օրինագծի ընդունման վերաբերյալ Թուրքիայում առաջինը կարծիք է հայտնել Արդարադատության նախարար Սադուլլահ Էրգինը, ով այդ պահին ուղիղ եթերում հեռարձակվող մի հաղորդման հյուր է եղել: Նա հայտարարել է, որ Ֆրանսիայի Սենատի որոշումը մեծագույն անարդարություն է և վկայում է Թուրքիայի նկատմամբ հարգանքի բացարձակ բացակայության մասին:

Թուրքիայի խորհրդարանի արտաքին կապերի հանձնաժողովի նախագահ Վոլքան Բոզքիրը  գրել է , որ Ֆրանսիան սև էջ բացեց իր պատմությունում:

Թուրքիայի վարչապետ Էրդողանը մտադիր է երեքշաբթի խորհրդարանում ունենալիք ելույթում ներկայացնել թուրքական կողմի պատասխան քայլերը:

Մինչ այդ հայերը տոնում են ցեղասպանության ժխտումը քրեականացնող օրենքի ընդունումը Սենատի առջև, իսկ թուրքական մամուլը հունվարի 24-ի տպագրության իր բոլոր գլխավոր էջերի համար ընտրել է օրինագծի ընդունմանը վերաբերող թեմաներ` «Պատմությունը գլխատվեց», «Ժողովրդավարությունը կոտորվեց», «Սենատը «պատմություն» գրեց», «Եվրոպան ժխտեց ինքն իրեն» և այլ վերնագրերով: