Ինչի՞ կարող է հանգեցնել հիգիենայի կանոններին չհետևելը

Հիգիենայի կանոնները պահպանելը բոլորիս համար դարձել է սովորություն, և մենք չենք էլ մտածում, թե ինչի կարող է հանգեցնել այդ սովորության բացակայությունը:  

 

Ինչու՞ է պետք լվանալ ձեռքերը

 

Այն, որ ձեռքերը պետք է լվանալ ուտելուց առաջ և զուգարան գնալուց հետո, պարզապես քմահաճույք չէ: Դա պաշտպանում է մեր օրգանիզմն այն բազմաթիվ ախտածին միկրոօրգանիզմներից, որոնք կուտակվում են մեր ձեռքերի վրա:  

 

Ձեռքերն այն կարևոր գործիքներն են, որոնք մենք անընդհատ օգտագործում ենք կենցաղում: Մենք շփվում ենք բազմաթիվ իրերի հետ, որոնք ստերիլ չեն (օրինակ`   փողը, դռան բռնակը, համակարգչի մկնիկը և այլն):  

  

Ի՞նչ հիվանդություններ է կարելի ձեռք բերել չլվացված ձեռքերի միջոցով՝

 

- Խոլերա

- Որովայնային տիֆ

- Հեպատիտ A

- Սալմոնելոզ

- Ճիճվակրություն:

 

Աղիքային ինֆեկցիաները հաճախ օրգանիզմ են մուտք գործում կեղտոտ ձեռքերի միջոցով: Այս հիվանդությունների հաճախականությունը մեծանում է ամռանը, երբ բարձրանում է ջերմաստիճանը, ինչը նպաստում է միկրոօրգանիզմի ախտածնության ակտիվացմանը:

 

Հիմնական ախտանիշներն են սրտխառնոցը, փսխումը և լուծը: Ըստ ագրեսիվության մակարդակի`   աղիքային ինֆեկցիաները կարող են հանգեցնել ջրազրկման և ջերմության կտրուկ բարձրացմանը՝ ընդհուպ մինչև սպառնալիք դառնալով մարդու կյանքի համար: 

 

Ե՞րբ լվանալ ձեռքերը և ինչպե՞ս

 

- Զուգարան գնալուց հետո

- Ուտելուց առաջ

- Դրսից տուն մտնելուց հետո:

 

Ձեռքերը չպետք է լվանալ սոսկ դա արած լինելու համար: Եթե ձեռքերը վատ լվանաք, ձեռքերի վրա կմնան մեծ թվով մանրէներ: Ձեռքերը պետք է լվանալ օճառով և հոսող ջրի տակ: Միայն այդ ձևով է կարելի մաքրել ձեռքերը միկրոօրգանիզմներից: 

 

Մի շարք գիտնականներ հայտնաբերել են, որ ձեռքերը լվանալն ունի նաև հանգստացնող ազդեցություն: Այն հանում է լարվածությունը և օգնում ձերբազատվել տհաճ զգացողություններից: