Կայծակնահարություն

Կայծակի հարվածի ուժն այնքան մեծ է, որ կարող է պատառոտել հագուստն ու կոշիկները՝ դրանք ցրելով չորս կողմ: Նույնիսկ որոշակի հեռավորության վրա հարվածելիս կայծակը կարող է զգալի վնաս պատճառել մարդուն. հարվածային ալիքից մարդը կարող է նետվել մեծ հեռավորության վրա, ստանալ

հոդախախտումներ և կոտրվածքներ: Լինում են դեպքեր, երբ կայծակի հարվածից առաջանում է խլություն կամ խուլհամրություն: 

 

Կայծակից տուժածի վիճակը սովորաբար ծանր է լինում: Տեղի է ունենում մկանների, մասնավորապես՝ ստոծանու և սրտամկանի կծկում, որը հանգեցնում է շնչառության և սրտի կանգի: Գլխուղեղի վրա հոսանքի ազդեցությունն արտահայտվում է գիտակցության կորստով կամ կաթվածով:

 

Կայծակի հարվածի տեղում մաշկի վրա առաջանում են տարածուն, երբեմն ծանր այրվածքներ (ածխացում): Կայծակի հարվածից կաթվածահար եղած ենթամաշկային անոթները մուգ կարմիր գույնի ծառաձև պատկեր են առաջացնում մաշկի վրա, ինչը հաճախ կայծակի են նմանեցնում և ասում, որ «կայծակը թողել է իր ստորագրությունը»: Կայծակը կարող է նաև խանձել մարդու մարմնի ողջ մազածածկույթը:

 

Կայծակնահարությանը շատ բնորոշ է այն, որ մարդու հագուստի վրա, գրպաններում կամ ձեռքին գտնվող մետաղյա իրերը (մետաղյա կոճակներ, զարդեր, ժամացույց, բանալիներ) հալվում են՝ առաջացնելով խորը այրվածքներ: Դեպքեր են եղել, երբ կայծակն առանց որևէ վնաս պատճառելու մարդու ձեռքից «խլել» է տարբեր մետաղյա առարկաներ և դրանք շպրտել բավական հեռու: 

 

Աղբյուրը՝ «Արտակարգ ալիք» լրատվական կենտրոն