Շնորհավոր տոնդ, ուսուցի´չ

Շատերն են ընտրում այդ դժվարին ճանապարհը, սակայն բոլորին բախտ չի վիճակվում այդ «լուծը» տանել մինչև վերջ: Սերնդեսերունդ ակնածանքով ու խոնարհումով են հիշում ուսուցչի անխոնջ, նվիրումով աշխատանքը:

 

Այսօր էլ գալիք սերունդների կրթության և դաստիարակության գործի լավագույն արդյունքներով է պայմանավորված մեր երկրի ապագան և վաղվա օրը: Այսպես և անմասն չմնացին Ջերմուկի Մ. Գորկու անվան թիվ 1 հիմնական դպրոցի աշակերտները` շնորհավորելով ուսուցիչների տոնը:

 

Վաղ առավոտյան կերպարանափոխված, տոնական և առինքնող էր դպրոցի բակը: Աշակերտները ջանք չէին խնայել հաճելի անակնկալներ մատուցելու իրենց ուսուցիչներին: Աշակերտները հանդիսավորությամբ արտահայտեցին շնորհավորանքների, երախտագիտության խոսքեր:

 

Ապա ուսուցիչներին պարգևեցին «տիտղոսներ»: Վերջապես իրականանում էր 9-րդցիների   երազանքը. այդ օրը նաև ինքնակառավարման օր էր… Աշակերտները ներքին հպարտությամբ մտան դասարաններ` յուրաքանչյուրը նախապատրաստված իր ընտրած առարկայի համար:

 

Նրանք դուրս էին գալիս դասարաններից և ուրախ, և մտահոգ դեմքերով… Պարզ էր մի բան՝ նրանք հասկացել էին, որ ուսուցչի աշխատանքն այնքան էլ հեշտ չէ, որքան իրենք էին պատկերացնում: Նրանք հասկացան, որ ուսուցիչ ոչ բոլորը կարող են դառնալ, որ այն կոչում է, ոչ միայն մասնագիտություն: