Ամփոփվել է «Լավագույն ուսուցիչ» մրցույթը

Տերունական աղոթքից հետո հանդիսությունը մեկնարկեց Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանի խոսքով:

 

Ողջունելով մրցանակաբաշխության առիթով Հայաստանի տարբեր մարզերից Մայր Աթոռ ժամանած ուսուցիչներին` Վարդան եպիսկոպոսն անդրադարձավ Վեհափառ Հայրապետի՝ մրցույթի հաստատման կարևորությանը և ուսուցչի մարդակերտման ծառայության խորհրդին:

 

Վարդան Սրբազանը սերունդների հոգևոր դաստիարակությանը, ճշմարիտ արժեքների սերմանմանը միտված ծրագրերի նկատմամբ ցուցաբերվող ուշադրության և հոգածության համար շնորհակալություն հայտնեց Վեհափառ Հայրապետին, ինչպես նաև ՀՀ ԿԳ նախարար Արմեն Աշոտյանին և նախարարության անձնակազմին սերտ և բեղմնավոր գործակցության կապակցությամբ:

 

Հանրապետական մրցույթի արդյունքներն ամփոփեց ՀՀ ԿԳ փոխնախարար Կարինե Հարությունյանը: Ուսուցիչներին շնորհավորեց նաև ՀՀ ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ Կարինե Աճեմյանը` կարևորելով եկեղեցի-պետություն համագործակցությունը կրթական ոլորտում:

 

Այնուհետև Ամենայն Հայոց Կաթողիկոսը հաղթող ուսուցիչներին հանձնեց մրցույթի մասնակցության վկայականները, սահմանված պարգևները: Մրցանակաբաշխությունն ամփոփվեց Ամենայն Հայոց Կաթողիկոսի պատգամով և օրհնությամբ: 

 

Նորին Սրբությունը խորհրդանշական նկատեց, որ մրցանակաբաշխությունն անց է կացվում Մայր Աթոռում, որտեղ հաստատվել և գործել է ազգային առաջին կրթական հաստատությունը, առաջին դպրոցը, ուր մանկավարժի, ուսուցչի պատվավոր աշխատանքն են իրականացրել Սահակ Պարթև Հայրապետը և Մեսրոպ Մաշտոց Վարդապետը:

 

Աղբյուրը՝ www.armenianchurch.org