Անկախության տոնը Փամբակ-Դարանակի միջնակարգ դպրոցում

«Ես քո զավակն եմ, Հայաստա´ն, դրա համար եմ հա´յ այսքան…» խորագրով ՀՀ Անկախության 23-րդ տարեդարձին նվիրված միջոցառմանն աշակերտները մասնակցում էին զինվորական համազգեստով:

 

Միջոցառման հյուրներն էին ՊՆ ներկայացուցիչներ, դպրոցի բարեկամ Գրիգորի Ֆարյանը, Վանաձորի «Վ. Հարությունյանի թատերական ստուդիայի» սան Անուշ Ղևոնդյանը, համագյուղացիների մեծ մասը:

 

«Սա իմ կյանքի այն եզակի պահերից է, երբ ես այս աստիճան հուզված եմ: Ես ուրախ եմ, որ մեր երկրի ապագան այսպիսի հայրենասեր սերնդի ձեռքում է լինելու»,- նշել է բարերարը: 

 

Անկախության տոնը ևս մեկ անգամ համախմբեց հայերին, երբ միջոցառման վերջում ուսուցիչներն ու աշակերտները ուս-ուսի տված քոչարի պարեցին: Հանդիսությունը հատկապես արժեքավոր էր սահմանամերձ գյուղում բնակվող ծնողների համար: 

 

«Հիանալի միջոցառում էր: Մեր դպրոցում երբևէ կազմակերպված միջոցառումներից լավագույնը: Երջանիկ էի` տեսնելով, որ մեր երեխաներն այդքան տաղանդավոր են: Հուսով եմ, որ այն, ինչի ականատեսը եղանք, նրանց ունակությունների գագաթնակետը չէր, և նրանք էլի կզարմացնեն մեզ»,- նկատել է փամբակի բնակիչ Մարինե Նաղդալյանը: